Молитвы

Тропарь блаженной Матроны

глас 2

Богом умудренную блаженную старицу Матрону,/ земли Тульския процветение/ и града Москвы преславное украшение,/ восхвалим днесь, вернии./ Сия бо, света дневнаго не познавши,/ светом Христовым просветися/ и даром прозрения и исцеления обогатися./ Пресельница же и странница на земли бывши,/ ныне в чертозех Небесных Престолу Божию предстоит// и молится о душах наших.

Кондак блаженной Матроны

глас 7

К служению Христову/ от чрева матерня предызбранная,/ праведная Матроно,/ стезею скорбей и печалей шествующи,/ твердую веру и благочестие явивши,/ Богу угодила еси./ Темже, почитающе память твою, молим тя:/ помози и нам в любви Божии пребывати,// старице блаженная.

Молитва

О блаженная мати Матроно, душею на небеси пред Престолом Божиим предстоящи, телом же на земли почивающи, и данною ти свыше благодатию различные чудеса источающи. Призри ныне милостивным твоим оком на ны, грешныя, в скорбех, болезнех и греховных искушениих дни своя иждивающия, утеши ны, отчаянныя, исцели недуги наши лютыя, от Бога нам по грехом нашим попущаемыя, избави нас от многих бед и обстояний, умоли Господа нашего Иисуса Христа простити нам все наши согрешения, беззакония и грехопадения, имиже мы от юности нашея даже до настоящего дне и часа согрешихом, да твоими молитвами получивше благодать и велию милость, прославим в Троице Единого Бога, Отца, и Сына, и Святаго Духа, ныне и присно и во веки веков. Аминь.

Величание

Величаем тя,/ святая блаженная мати Матроно, / и чтим святую память твою:/ ты бо молиши о нас// Христа Бога нашего.

Скачать молитвы Матроне Московской-Себинской в формате PDF